اوکھلا میں مسلم رائے دہندگان کی تقسیم کے لئے سازشیں رچی جارہی ہیں تاکہ بے جے پی کی جیت کی راہ ہموار ہوسکے:امانت اللہ خان
نئی دہلی: میرے اوپر انصاف کے پردے میں مرکزی حکومت کے اشارے پر جتنے مظالم ڈھائے گئے مجھے بدنام کرنے ذلیل کرنے کے لئے جو حربے استعمال کئے گئے آزاد ہندوستان میں اعظم خاں کے بعد شاید میں واحد شخص ہوں گا۔یہ باتیں امانت اللہ خاں نے شاہین باغ میں منعقدہ ایک میٹنگ کو خطاب کرتے ہوئے کہی۔ انھوں نے کہا کہ میرے اوپر ۲۵۸روپے ڈکیتی کا بھی مقدمہ درج کیا گیا اور یہ سب اس لئے ہوا کہ میرا نام امانت اللہ خاں ہے اور عوام پر ہونے والے مظالم اور نا انصافی کے خلاف لڑتا ہوں۔
میری تمام سیاسی جدوجہد ان لوگوں کے لئے ہے جو انصاف سے محروم ہیں جو بے آسرا اور بے سھارا ہیں -امانت اللہ خاں نے کہا کہ حکمراں یہ بھول جاتے ہیں کہ ان سے بھی بڑی ایک طاقت ہے جسے ہمُ اللہ کہتے ہیں۔ انھوں نے کہا کہ کچھ طاقتیں اوکھلا کے ماحولُ خراب کرنا چاہتی ہیں اور مجھے مٹانے و برباد کرنے کے منصوبے بنائے جارہے ہیں۔مسلم رائے دہندگان کی تقسیم کے لئے سازشیں رچی جارہی ہیں تاکہ بے جے پی کی جیت کی راہ ہموار ہوسکے لیکن مجھے اللہ کی ذات سے امید ہے کہ عوام ان سازشوں کو ناکام بنادیں گے۔
انھوں نے کہا کہ ہندوستان کی تمام سیاسی جماعتیں اپنے امیدوار صرف مسلم اکثریتی حلقوں میں اتاررہی ہیں تاکہ مسلم ووٹ تقسیم ہو، ان کے امیدوار بی جے پی منتخب کر رہی ہے لہذا اس سازش کو سمجھنے کی ضرورت ہے۔ امانت اللہ خاں نے کہا کہ اوکھلا کی میں نے اپنے لہو سے آبیاری کی انھوں نے انتہائی جذباتی انداز میں کہا کہ میرے اوپر الزام لگانے والوں کو سوچنا چاہیے کہ میرے خلاف ہندوستان کی تمام ایجنسیوں نے مقدمات درج کئے ہر ایجینسی نے تحقیقات کیں اور اللہ نے مجھے سرخروئی عطا کی انھوں نے کہا اس غریب کی جھولی خالی ہے یہاں صرف محبتیں ملیں گی-امانت اللہ خاں نے مزیدکہا کہ اوکھلا باوقار غیرت مند باشعور لوگوں کا علاقہ ہے یہاں ہندوستان کی تقریبا تمام ملی جماعتوں کے مرکزی دفاتر ہیں چنانچہ یہاں سے اٹھنے والی آواز یہاں کے عوامی فیصلے پورے ملک پر اثر انداز ہوتے ہیں لہذا مجھے یقین ہے کہ عوام کسی سازش کا شکار نہیں ہوں گے اور ان طاقتوں کو شکست فاش دیں گے جو ان کے ووٹوں ُ کے ذریعہ بی جے پی کے لئے راستہ ہموار کررہے ہیں یا غیر اعلانیہ طور پر بی جے پی کے معاون ہیں۔
